Revelation of John 18
Bebiloni hepa'i tele tulu bi'ehina ka'a
1To nani agelo mone kokulumaguti limigo bu go'ohuna. Ai amuya'a legege huto mino'ehina to fana meha'auba melugu i besa lago bu go'ohuna. 2Ai ka sipi luto ma luto lu'ehina: Bebiloni hepa'mo tele tulu bito bibe. Ai ho limito nobibe. Buloto foipa fele fato fato'mofihi nohi hepa'a li lolo huto nohibe. To nama kolotana laga mehana'a fato fato'magi enali nohi hepa'i lolo huto nominabe. 3Ai noto noto bona'i enali'i amuya bai nagami tegi hite moko fise nasana'a epigo mikili helata hi'ahanamo ni'ibe. Noto noto bona'i enigihiti bo enali lolo hilete moko lise'namofihi foya'a lite minelata hi'ahanamo ni'ibe. Noto noto bo sipi mokolo a'mofihi nasanaguti bisinisi foya lilata nehana bona'i henetite lili'na kana'amofihi suhi hilata hi'ahana to fe'noha'ani lite yamofihi lolo hilata hi'ahanamo ni'ibe.4Ya luto lulago kokulumaguti nogo mone ma luto limigo keheli'ohube: Yagapana'ni lenali ana nohi hepa'i ya'ma he'milete alo. Aitogati alo. Yalo minete ya hepa'mofihi foipa nasana le'mo bati hi lalagi. To lose lose nasana'a lenalitoga imo o laligi. 5Ana hepa'mofihi foipa nasana'a ya'ma ikupilo akupilo huto tito kokulumagu fiya ilina'a nohibe. To ya'ma Hu'mau kolo tanana'amu ekesu menohabe. 6Yana'mu li lepilata nehana nona'a li gelehe hite epilo. Ya hilete yamofihi ibe ligi abe ligi hite pa se epalalo. Mone kegi'a ekesa nagami suhi huto lenali nalabe lite le'mo babahi hi lepele'ahanamo ana suhi hite ite tite ihe'ma ahe'ma hite epilo. 7Enugufamofihi le'mo lite tite minete laga'amofihi gupisalo mineme bite meleke takehi hite minelata hi'ahanamo ni'ibe. Yamofihi mone kegi'a eniginaga fise'na to enuluhaya enagabu gilatana ya'ma li huto hite epilo. Ana hepa'uba ya'ma a'mofihi sipi a'i legi huto minoto komopa'agu ekesa kehelito ma luto nolina: Nani nominoto'ni sipi a'i gihiti bo'ani legi huto nohube. Nani keto a'i menohube. Eniginaga fise'na mekehelise laga'namofihi gupisalo mino lito buto minalube'mu hube. 8Lulata hu'ehinamo ni'inaya kana'a moneko yupahi ana hepatoga gumi'i lise'na asaga'i huto hu etalina'mu yabe. Fililata nasana to enuluhaya enagabu gilatana to kau'na enohose'na huto hulenogo ana hepa'i logomofihi laha'a lolo huto minalibe. Sipi bo Hu'ma ai amuya'a hiti bouba foipana'a pa noso etoto nona'a emilibe.
9To noto noto enikibina bona'i hiti ya'ma a'mofi kumu be gelete lagati lebesibe lite moko lite ana hepato logo efahi keyete nete minelata hi'ahanamo enali logomofihi lokiya'a netinogo be gelete yibisu kalasu hite eniginaga finogo minalabe. 10Ya nehinogo ya'ma hepa'mofihi enagabu gise nasana keheli fa'menena lolo hu'ehina yanamofihi hapa'a be gelete enefelele'i binogo foto'i mine nemelete ma lite lilabe: Akae. Akae. Bebiloni hepa'i sipi foipanaka mino mone kegi'a nomalago katiya'i hupamone huto hu kimibe.
11To noto noto bisinisi foya nelina bona'i enali lali fe'nohati ya'ma ki'afu mina filina ni'ibe? lite ana hite yibi higo keke'i li etalabe. 12Enali fe'nohi ya'ma ana hite mina filata hi'ahana. Goli efahi to siliba efahi to mina'a tito ni'ina efahi fato fato'mofihi to mina'a tito ni'ina pesesu'i to gukete fayaha'a hiti asaga hapa'a to nupa gu'i to lapa mebina'a to gi'a silika yabe safa kata to sege yafa lamana'a fato fato'mofihi to elefeti yagamofihi baga yogo'a sipi lite lolo hi'ahana nasana to hetofa yafatu to kopatu to aeonitu to kala efatu ana'ina lolo hi'ahana. 13To sefeyehi tu'a fato fato'i to gupa'i legita nasana to tu'a hiti mamufa gilata nasana to lokiya tu'a hiti tilata nohina nasana to tufofo lilina lamana'a to bai nagami'i to mesebe oliba ueli to fala'ua kehe'i to uiti legeya'a to bulumaka yaga to sipisipi yaga to hosi yaga to hosi yagamagihi kele fefe hulata kale nasana to kele kele yagapana'i to bona'magihi enemehi mina filata hi'ahanamo ni'ibe. 14To bisinisi foya lilata nehana bona'i enali ya'ma lite lilabe: Lili'na kanaka bu go bati bati huto minolata hu'ahatamo ya'ma fa'menena lolo huto asu habe. To amuyaka kololo hoto nobibe. To sekele mamukamo hiti to yogo fe'nohaka hiti buto fenene huto asu ho'ehibe. Hena huto aku'i lilatamo ni'ibe? lite lilabe. 15To enali ana'inamofihi ana hepatoga mina fite moni fe'nohi li nupa hilata hi'ahana enali keta'a hiti nasana keheligo fa'menena lolo hu'ehina ya'ma be gelete koli hite foto'i mine melete nehite yibi hafili hi etete keke'i li epalabe. 16Ya nehite ma lite lilune'mu habe: Akae. Akae. Hepa'i sipi'amobe. Hena hilibe? Lose lose gukete koholina nupa'na safa'na lito i kolo bilata hu'ehinamobe. To fayaha'a hiti nasana golitu lolo hi'ahana fato fato'mofihi to mina'a tito ni'ina efahi fato fato'mofihi to mina'a ni'ina hetofa pesesu'i minolata hu'ehinamo ni'ibe. 17Ya'ma lili'na'a hupamone asaga mina'a tito ni'ina fe'nohi katiya'i fa'mene fenene hilibe, lite lilabe.
To asaga nagamilugu botimofihi afo'agi to anagu bonoho bona'i to botigu lili'na lilata nehana bo to hege nagamilugu bisinisi foya lilata hi'ahana'a enali ya'ma ana hite logomofihi lokiya netinogo bu neegete foto'i mine melete minalabe. Nehite keke'i li epelete kehe sipi ite ma lite lilabe: Akae. Hepa'i ya'ma sipi'amofihi ya hu tegi'a hepa'i mone aku'i hiyaga huto hu'ehina yabe? 19Ya lite lilete oifa'i lahi lataha'anilo felete yibisu kalasu hi etete keke'i li etalabe. To kehe ite ma lite lilabe: Akae. Akae. Hepa'i sipi'amo ana hepa kumu yabe lite hege nagamilugu botimofihi afo'agi ana hepa'mofihi ana'ina lolo hilata fe'nohi li nupa hi'ahana'a enali ya'ma hupamone kana'alo fa'mene kame koko notibe lite lilabe.
20Lenali kokulumagu nehana to Hu'mamofihi pa sose bona'a to aposolo bo to mono ka lu yege hose bo nehana lenali ya'ma lenegelo bite komopatinigu bati hino. Hepa'i sipi'amofihi foipana'amagi lenalitoga keta'a hu lepele'ahanamo ya'ma Hu'mau yatai nona'a epito pa nosabe.
21Agelomagihi ka'ani ma luto huto hulago agelo amuya bo moneuba efahi fela'a mone kofito oto hege nagamilugu fi felu ho he'migo limi'ehina. Nolimigo ma luto lu'ehina: Bebiloni hepa'i sipi'amofihi suhi huto amuya moloto fi felu ho he'minogo buto su ho lamana hilube'mu hibe. Bona'magi ana hepa'i aku'i bu megalabe luto lu'ehina. 22To sipilohi ite gita ite folonemeyaha kohi fu lite pikuli fu lite minelata nehana li gehesa hite minete enali nogo'ani ya'ma nehana hepa'i enalitoga aku'i mone huto mehilube'mu hibe. To enayatu fayahi keye'ahana'a ya'ma enalitoga alo'i su halube'mu nohibe. To foya'ani ya suhi hite fopo fapa hi'ahana ya'ma huto mehilube'mu hibe. 23To hupamone su halube'mu hibe. Libi'mofihi fana mehena'a enalitoga mone besa besa melalina'mu yabe. To le'mo nemelenogo boana'i enali ana'i kata hilana nasanamofihi nama enonogo ana huto enali hepato mone huto mehilube'mu hibe. To bisinisi foya lilata nehana bona'a noto noto bona'i enigihiti bo lolo hite minelata hi'ahanamo ni'ibe. Enali faga faga lise nasana to nalisana'anitu noto noto bona'i komopa'ani li sibina hulata hu'ehinamo ni'ibe.
24To mono ka leli'ali bo to Hu'mamofihi pa sose bona'a to noto noto bona'i yege yege kumu yabe lite Bebiloni bona'magi enoho fili'ahanamofihi golaha'aniuba mina'a ya'ma ana hepa'i napaga mino'ehina ya'mu Hu'mau osahi epilina'mu ya suhi ma suhi huto hu eto'ehina yabe.
Copyright information for
BEF